Blesi segir ...

Konan og verðbréfasalinn

2008-09-20T12:27:00.002Z

Tvær konur eru á gangi í skógi þegar þær hitta frosk. Froskurinn kallar á þær og segir:”Ég er verðbréfasali, en ill álög breyttu mér í frosk. Ef þið kyssið mig breytist ég til baka”.

Önnur konan grípur froskinn og treður honum í töskuna sína. Hin konan horfir undrandi á aðgerðir konunnar og spyr:”Af hverju ertu að troða honum í töskuna þína, heyrðurðu ekki hvað hann sagði, hann er verðbréfasali”

“Jú, jú” segir hin, “ég heyrði alveg í honum, en eins og markaðir eru núna er bara miklu gróðavænna að eiga talandi frosk.”

Fengið af http://brandarar.net

Einn góður

2008-06-05T19:29:00.002Z

Ég lifi góðu lífi, sagði sjómaðurinn. Ég sef frameftir á morgnana, fiska dálítið, leik mér við börnin mín, tek "siesta" með konunni, rölti niður í þorpið á kvöldin og fæ mér vínglas og leik á gítar með vinum mínum.

Ég get gefið þér góð ráð sagði Reykvíkingurinn. Ég er ráðgjafi með MBA frá Háskólanum í Reykjavík. Þú átt að veiða meira. Þá færð þú meiri afla og getur keypt þér stærri bát og þá veiðir þú enn meira. Síðan getur þú keypt heilan flota af bátum og þá ertu ekki lengur háður því að selja í gegnum milliliði en getur verslað beint við verksmiðjurnar, sett upp verksmiðjur og jafnvel ráðið markaðnum. Þá þarftu ekki lengur að búa hér heldur getur þú flutt suður.

Hvað tekur þetta langan tíma? spurði veiðimaðurinn.

Svona 20-25 ár. En hvað svo? spurði veiðimaðurinn.

- Þá kemur stóra stundin, sjáðu til. Þú breytir fyrirtækinu í hlutafélag, ferð á markað og selur og stendur uppi með marga milljarða.

- Já, sagði veiðimaðurinn en hvað svo?

Reykvíkingurinn varð dálítið hugsi en sagði síðan: Þá flytur þú í lítið þorp, sefur frameftir á morgnana, fiskar dálítið, leikur við börnin, tekur "siesta" með konunni, röltir á kvöldin niður í þorpið og færð þér vínglas og leikur á gítar með vinum þínum.!!!

Komin úr dvala

2008-05-19T21:30:00.003Z

Blessuð og sæl öll sömul :O)

Eftir "nettar" ábendingar á bekkjarmótinu sl. helgi þess eðlis að ég væri ekki alveg að standa mig í blogginu var nú bara ekki hægt annað en að taka upp þráðinn.

Ég var búin að bíða spennt e. því að sjá hvað strákarnir væru orðnir kallalegir og stelpurnar kellingalegar en viti menn ´93 árgangurinn er eins og eðal koníak. Strákar þið hafið aldrei verið myndalegri og stelpur við erum allar skutlur!! Ef þið trúið mér ekki þá getið þið skoðað myndirnar á myndasíðunni hér til hliðar.

Talandi um myndir, Hafdís ég fann gamlar myndir af okkur í hesthúsinu með þeim Svarta-Pétri og Guddu. Sendi til þín um leið og ég kemst í skanna :O)

Því miður þá náði ég ekki að tala við eins marga og ég hefði kosið en náði þó að tala við vel flesta. Eftir að hafa hlustað á Einar Karl og Ósk segja frá slysinu sem þú lentir í Einar sl. sumar og vitandi það að þú ert komin aftur til starfa í sama starfið og opnar enn lokið sem nánast sprengdi þig í loft upp fær mig til að velta því fyrir mér hvaðan þú færð kjarkinn til að halda ótrauður áfram í starfi þínu.

Í morgun þegar ég mætti í vinnuna, á 6 hæð í Borgartúninu, varð mér litið út um gluggan. Við mér blöstu einir 8 byggingakranar hímandi yfir Sætúninu og 101 Skuggahverfi. Mér varð hugsað til þín Maggi Más, hvernig er að sitja þarna uppi í hífandi roki og stjórna þessu risa tæki? Þetta er ekkert grín, með gríðarlegar þyngdir á króknum sem sveiflast eins og pendúll!

Ein vinsælasta spurning bekkjarmótsins var án efa hvað ert þú að gera í dag? Eitt svarið sem ég fékk var "ég er bara í barneignafríi" Adda mín, ég hef aldrei heyrt um 3ja barna móðir sem er bara í fríi!

Daði Hrafn, BootCamp. Hvað ertu búinn að plata mig út í!!!

Þetta var ógleymanlegt kvöld, hlakka til að hitta ykkur öll að 5 árum liðnum.
Knús og kossar
Edda Kamilla

Karlmenn!

2008-02-17T23:44:00.000Z

Sverrir var eitt sinn á gangi á Laugaveginum þegar hann sá Berg vin sinn koma akandi á splunkunýjum jeppa. Bergur stoppaði að sjálfsögðu hjá honum og veifaði glottandi til hans. Sverrir gekk upp að bílnum. "Hvar í ósköpunum fékkstu eiginlega þennan jeppa?" spurði hann hissa. "Hún Stína gaf mér hann" svaraði Bergur glaðbeittur. "Gaf hún þér nýjan jeppa?" át Sverrir upp eftir honum. "Hvers vegna í ósköpunum?"
"Ég skal bara segja þér hvað gerðist,"sagði Bergur. "Við vorum í bíltúr um daginn, einhvers staðar uppi sveit . Allt í einu ók Stína út af veginum, setti jeppan í fjórhjóladrifið og keyrði eitthvað langt út í móa. Þegar hún var búinn að skröltast yfir hóla og hæðir stoppaði hún bílinn, fór út og klæddi sig úr öllum fötunum, lagðist á jörðina og sagði: "Beggi minn taktu það sem þú vilt!" "Svo ég tók jeppann." "Þú ert bráðsnjall," sagði Sverrir og kinkaði kolli. "Fötin hefðu hvort sem er aldrei passað á þig.

Hehehehehe...

2008-02-17T23:03:00.002Z

Á leiðinni heim...

2008-02-13T21:28:00.003Z

Alltaf er maður jú á leiðinni heim en þeir eru óútreiknanlegir krókarnir sem verða á vegi manns. Síðastliðið sumar ákvað ég að flytja heim í Eyjafjörðin og var alveg harð ákveðin. Sendi hestana heim í sveitina og skráði mig á ráðningaþjónustur með skýrum og skilmerkilegum hætti að ég væri að leita mér að framtíðarstarfi á Akureyri. Eitthvað fóru sú fyrir mæli fyrir ofan garð og neðan hjá einni ráðningaþjónustunni og var ég boðuð í atvinnuviðtal fyrir starf í Reykjavík. Á þessi mistök leit ég á sem gott tækifæri til þess að æfa mig fyrir atvinnuviðtöl á Eyjafjarðarsvæðinu og skellti mér í viðtalið. Viti menn! Edda tók tilboðinu og er alveg alsæl í nýju vinnunni, í höfuðborginni. Já ég kem víst ekki alveg strax heim en leiðin liggur alltaf þangað.

Nú skil ég stráin

Nú skil ég stráin, sem fönnin felur
og fann þeirra vetrarkvíða.
Þeir vita það best, sem vin sinn þrá,
hve vorsins er langt að bíða.

Að haustnóttum sá ég þig sigla burtu,
og svo komi hinn langi vetur.
Þótt vald hans sé mikið, veit ég þó,
að vorið, það má sín betur.

Minningin talar máli hins liðna,
og margt hefur hrunið til grunna...
Þeir vita það best, hvað vetur er,
sem vorinu heitast unna.

En svo fór loksins að líða að vori
og leysa mjallir og klaka.
Ég fann, að þú varst að hugsa heim
og hlaust að koma til baka.

Þú hlýtur að vera á heimleið og koma
með heita og rjóða vanga,
því sólin guðar á gluggann minn,
og grasið er farið að anga.

Davíð Stefánsson frá Fagraskógi
1895-1964

Snjöll sú gamla...

2008-01-31T11:23:00.001Z

Einu sinni var gömul kona að ganga niður götu með tvo troðfulla ruslapoka.
Lögreglumaður stóð þarna rétt hjá og tók eftir því að það var gat á öðrum pokanum og 5000 kr seðlar flugu úr pokanum endrum og eins. eitthvað fannst honum þetta dularfullt og gekk upp að konunni 'góðan daginn væna mín' sagði hann 'hefur þú tekið eftir því að það eru 5000 kr seðlar fjúkandi úr pokanum þínum?' konan stoppar og lítur bak við sig og sér seðlana á víð og dreif um götuna 'Æ þakka þér fyrir væni minn'
stundi í konunni 'Ég ætti nú að drífa mig í að taka þá upp' En þegar hún ætlar að leggja af stað að týna upp seðlana stöðvar lögregluþjónninn hana 'Engan asa væna mín, hvernig stendur eiginlega á því að þú ert með fullann ruslapoka af fimm þúsund köllum? varstu að ræna banka?' Gamla konan brosti 'nei það gerði ég nú ekki en það vill svo til að bak við garðinn minn er stór fótboltavöllur og alltaf þegar mikilvæg mót eru í gangi að þá koma oft ungir menn og míga í blómabeðin hjá mér svo ég tók upp á því að standa þarna með garðklippurnar og segja '5000 kr. eða ég klippi hann af' 'jahá..
þetta er áhugaverð hugmynd' sagði lögregluþjóninn hugsi '..en hvað ertu með í hinum pokanum?'

'Það eru ekki allir sem borga...'

Byrjuð í nýju vinnunni

2008-01-17T20:42:00.000Z

Á miðvikudag byrjaði ég í nýju vinnunni minni hjá VBS og leggst hún vel í mig. Einu sinni í viku förum við vinnufélagarnir saman í hádeginu og spilum fótbolta. Eftir fyrstu 15 min. stóð ég bókstaflega á öndinni, úff og til að toppa þetta endanlega lét ég hafa mig út í það að skrá mig á fótboltamót á Akureyri um þar næstu helgi. En það verður gott að renna fram í sveit og knúsa hestana :o) Núna um helgina verður haldið að Flúðum í sumarbústað. Þar ætlum við stelpurnar að hittast líkt og undan farin ár. Ég hlakka til að hitta ykkur Sínur.

Úlfur afi hefur kvatt

2008-01-10T18:22:00.000Z

Um klukkan 11 í morgun kvaddi Úlfur afi jarðneskt líf. Minning hans mun lifa í hjarta okkar. Blessuð sé minning hans.

Uppfærsla

2008-01-10T17:49:00.000Z

Á ýmsu hefur dunið frá síðustu færslu, enda um 3 mánuðir liðnir. Prófum er lokið og gengu þau ekki alveg eins og áætlað var :o/ Þessa önnina verð ég aðeins að skrifa B.Sc ritgerðina en við verðum tvær sem skrifum hana saman. Ég er svo heppin með að hafa hana Gunni með mér í ritgerðarskrifunum, hún er alveg frábær! Við hittum leiðbeinandan okkar í fyrsta skipti í dag, en við erum svo lánsamar að fá hann Jón Sigurðsson. Maður fann það vel á fyrsta fundi að þarna er vanur leiðbeinandi á ferð.

Ég er búin að vera vinna hjá SPRON með skólanum en er núna farin að huga að framtíðarstarfi. Mest af öllu þá langar mig að flytja norður, já sveitin togar. En auðvitað vega og þættir líkt og tækifæri til starfsreynslu og laun miklu um val á starfi. Ekkert er jafn óspennandi og að hjakka í sama farinu um ókomandi ár.

Á nýju ári eru hestarnir mínir orðnir aðeins þrír, Blesi, Straumur og Máni. Hann Logi var felldur í Hólakoti eftir að hafa slasast illa á fæti, samkvæmt dýralækni var ekkert annað hægt að gera. Blessuð sé minning hans. Klárarnir mínir þrír búa við gott atlæti í Ysta-Gerði.

Árið 2008 byrjar með óvissunni, hlakka til að vita hvaða tækifæri bíða handan við hornið :o)

Tímaþjófurinn MySpace

2007-10-05T20:58:00.000Z

Úff já það er ekkert grín að halda þessu MySpace-i úti. Þegar maður er loksins búin að velja sér útlit og tónlist þá fær maður vírus í heimsókn!! Þannig að núna er ég komin með nýtt MySpace með nýju útliti og tónlist. Allt á kostnað bloggsins :o/ Slóðina má finna hér til hægri á síðunni.

Þremur miðannaprófum er nú lokið í bili og eitt er á mánudaginn, hver mínúta skipulögð í þaula. Gaf mér þó tíma til að fara í Krónuna og versla eitt og annað í ískápinn, aðallega pepsi max í tilefni nammidagsins á morgun! Þegar ég var að raða í pokann fékk ég símtal frá henni Jönu vinkonu og við skelltum okkur saman á Nings að borða. Klikkar ekki lambakjötið á Nings, mjúkt undir tönn, bragðgóð sósan og msg frítt og góður félagsskapur.

Íslensk tunga...

2007-09-22T13:28:00.001Z

...hefur verið töluvert í umræðunni í vikunni þar sem vangaveltur hafa verið uppi um hvort að "stórfyrirtæki" íslands muni taka upp ensku sem innanhúss tungumál. Sitt sýnist nú hverjum og átti ég athyglivert samtal við einn vinnufélagan minn sem stundar nám í þýðingafræðum. Þótti henni það nú ekki mikið að Landsbankinn myndi ráða til sín þýðendur sem færu í gegnum alla pósta fyrirtækisins, sem vörðuðu þau störf sem eru þar unnin, og láta þýða þá þannig að þeir væru bæði á íslensku og ensku (fyrir útlendinganna). Ég hugsaði bara "VÁ, hvað ætli það séu margir póstar!" En svona þar fyrir utan, hver erum við að setja slíkar kröfur á alþjóðlegt fyrirtæki, líkt og Landsbankinn er? Væri okkur ekki betra að líta okkur nær? Ganga á undan komandi kynslóðum með góðu fordæmi, með vel mæltri íslenska tungu? Við ætlumst til að þeir sem flytja inn í landi okkar sýni þá kurteisi að læra málið okkar, og hvað gerum við? Svörum þeim á ensku!! Við þurfum að líta okkur nær. Hvernig er það með fjölmiðlana okkar? Við látum okkur varða eignarhald þeirra en gerum við kröfur um íslenskt málfar þeirra? Nei, hef ekki orðið vör við það. Við þurfum að líta okkur nær. Gagnrýnum við þingmenn okkar fyrir málfar þeirra og orðaforða? Nei, við segjum bara Guðna Ágústsson tala skringilega. Við þurfum að líta okkur nær. Gætum byrjað á því að lesa skáldin okkar líkt og hann Guðni ráðleggur í Blaðinu í dag. Læt hér fylgja Stökur Jónasar Hallgrímssonar, svona til gamans.

Enginn grætur Íslending
einan sér og dáinn.
Þegar allt er komið í kring,
kyssir torfa náinn.

Mér er þetta mátulegt,
mátti vel til haga,
hefði ég betur hana þekkt,
sem harma ég alla daga.

Lifðu sæl við glaum og glys,
gangi þér allt í haginn.
í öngum mínum erlendis
yrki ég skemmsta daginn.

Sólin heim úr suðri snýr,
sumri lofar hlýju.
Ó, að ég væri orðinn nýr
og ynni þér að nýju!

Lestur góðra ljóða

2007-09-19T16:22:00.000Z

Vafraði inn á skemmtilega síðu sem ég hef ekki uppgötvað fyrr en það er http://www.ljod.is/firstpage.php. Þarna gleymdi ég mér dágóða stund við lestur góðra ljóða. Hefði kannski betur sökkt mér að sama skapi í námsbækurnar, en hvað er nám? Er ekki hægt að draga dágóðan lærdóm af lestri góðra ljóða, lærdóm lífsins kannski?

Nú baðar jörð í blóði,
og barist er af móði,
og þessu litla ljóði
mun lítil áheyrn veitt.
Og þótt ég eitthvað yrki
um Englendinga og Tyrki,
má telja víst það virki
sem verra en ekki neitt.

Ég ligg hér einn og lúinn,
úr lífsins harki flúinn,
og vilja og vopnum rúinn
á vinsamlegum stað.
Manns hug ei hátt skal flíka,
ég hefi barist líka
og átt við ofraun slíka.
En ekki meira um það.

Vort líf er mikil mæða
og margt vill sárið blæða,
og knappt til fæðu og klæða
er kannske nú sem þá.
En samt skal sorgum rýma,
þótt sækist hægt vor glíma,
því eflaust einhverntíma
mun einhver sigri ná.

Og berjist þeir og berjist
og brotni sundur og merjist,
og hasli völl og verjist
í vopnabraki og gný.
Þótt borgir standi í báli
og beitt sé eitri og stáli,
þá skiptir mestu máli
að maður græði á því.

Hugleiðing um nýja heimstyrjöld, höf: Steinn Steinarr

Hver var aftur ástæðan fyrir því að farið var inn í Írak?

Súper sumar!!!!!

2007-09-18T22:19:00.000Z

Verð bara að segja það, magnað sumar!!!

Setti met í norðurferðum þetta sumarið, fór alls x4 án þess að tilefnin væru ýmist ferming eða jarðaför. Um verslunarmannahelgina fór ég með pabba og Úllu systir upp í Grána sem stendur við Geldingsá en hún rennur í Eystari Jökulsá sem rennur niður Austurdal. Það var alveg magnað, langaði helst ekki aftur til byggða. Stefni á að ganga næsta sumar frá Grána í Hildarsel og þaðan niður í Ábæ og Merkigil, hver vill koma með?

Fór á eitt ættarmót. Þar hittumst við niðjar Eiríks afa og Ömmu Klöru. Klara frænka fór á kostum fyrir okkur hinum, hélt okkur öllum vel við efnið :o) Já, það var nú engin lægð yfir mannskapnum, hehe bara gaman.

Gekk x2 á Esjuna og hafði báðar ferðirnar af, ótrúlegt alveg þar sem að formið er meira svona fyrir Úlfarsfellið :o/ Er enn á leiðinni í boot camp...

Hestarnir eru komnir norður í gott atlæti til þeirra Siggu og Kalla í Hólum. Straumur fór til að byrja með til Lúlla í Möðrufelli í tamningu, já tamningamaðurinn sendi hestinn sinn í tamningu!! Hann var þar í 6 vikur og ég er mjög ánægð með árangurinn, Lúlli þú átt gott hrós skilið fyrir vel unnið verk ;o) Máni minn meiddi sig á framfæti um daginn en það er allt að gróa, þökk sé þeim Gesti dýralækni og Bjössa frænda í Hólakoti. Bjössi tók hann Mána að sér og sá um að þrífa sárið og bera á það, Gestur kom svo reglulega og fylgdist með. Takk strákar mér þykir mjög vænt um þetta :o)

Sjálf stefni ég norður eftir áramótin en þá á ég vonandi aðeins e. BS ritgerðina, gangi allt að óskum. Markmiðið er að komast inn í Mastersnám við HA næsta haust. Hver veit ...

Stiklað á stóru

2007-06-04T22:05:00.000Z

Þá er verkefnatörninni og lokaprófunum lokið í bili. Búin að fá allar einkunninar og er nokkuð sátt. Á laugadaginn verður diplóma útskrift og í tilefni dagsins opið hús fyrir vini og vandamenn.

Skrapp til Liverpool um daginn með Hörpu frænku og lukkaðist ferðin vel. Komst í Oasis himnaríki bókstaflega, geggjuð útsala þar sem búðinni (Lewis) var að loka. Kíkti aðeins á barinn og uppgötvaði franskan martini, jammi, en láðist því miður að spyrja hvað væri í honum :/

Núna er ég hætt hjá Símanum og farin að vinna sem viðskiptastjóri hjá SPRON á Skólavörðustígnum og líkar mjög vel. Vá hvað það er margt sem hægt er að læra í þessu starfi.

Senn líður að því að ég fái hestana til mín, hlakka svo til!!! Þeir verða á sama stað og í fyrra, hólfinu góða í Mosó, búin að girða og núna er bara að bera á og hafa samband við flutningabíl.

Fréttir af gömlum skólafélögum

2007-03-18T21:26:00.000Z

Suma daga verður maður hreinlega að svala búfræðingum í sér og kíkja inn á www.bondi.is og bændablaðið. Það vildi svo skemmtilega til að í vikunni þegar ég var að vafra á þessum slóðum að ég rakst á mynd af kauða sem ég kannaðist eitthvað við. Við nánari athugun kom í ljós að þarna var á ferðinni Matti skólabróðir frá Hólum. Matti karlinn er ferðamálafrömuður að Suður-Bár í Grundarfirði og er nú farinn að blogga um bændur og sveitir, slóðin er;
http://sveita.blog.is/blog/sveita/ Alltaf gaman að fá fréttir af gömlum skólafélögum.

Tók mér pásu frá bókunum í gærkvöldi og kíkti í bíó með Hörpu frænku á The Last King Of Scotland, mæli alveg hiklaust með henni. Eftir bíóið skellum við frænka okkur á Ölstofuna góðu og skáluðum í hvítvíni yfir hinum ýmsu umræðum sem fram fóru í kringum okkur. Á næstu borðum mátti heyra óm af hugrökkum útlendingum reyna að hefja vitibornar samræður við drukkna íslendinga. Merkilegt með okkur íslendingana hvað áfengið virðist smyrja í okkur málbeinið og "glæða vitið", hver veit meira um málefni líðandi stundar en kenndur íslendingur? Nákvæmlega!

Einu verkefni lokið, fjögur eftir

2007-03-13T22:12:00.000Z

Já, mars hefur heldur betur verið "crazy" og kemur til með að vera það út mánuðinn. Það þýðir sko ekkert væl, nú er bara að bretta upp ermar, bíta á jaxlinn og klára verkefnin. Klikkar ekki múttu mottóið ;=). Þetta er allt að koma, diploma útskrift í júní, enginn sumarskóli og bara ein önn og Bs ritgerðin eftir. Úff, kannski er manni að takast að verða loksins "stór".

Ég gaf mér tíma í dag til að fara inn á ruv.is og hlusta á nýja evrovisiontextann, bara verð að segja það að ég fíla hann í botn. Go Big Red, Go ;)

Annars er fátt að frétta, maður er bara á kafi í bókum og límdur við tölvuskjáinn, veit varla hvað er að gerast í þjóðfélaginu :/

Helgarfrí

2007-03-01T22:06:00.000Z

Loksins, loksins helgarfrí. Jebbs, hvorki vinna né skóli hjá mér um helgina. Enga síður þá er maður nú búinn að plana alla helgina, svona er maður nú. Föstudag og laugardag kem ég til með að eyða uppí skóla í verkefnavinnu á milli þess sem ég ætla að taka feitt á því í ræktinni (ekki veitir af :/), smella mér í eins og einn ljósatíma og gott ef ekki í heitapottinn í laugardalslauginni. Ætli Jude Law verði kominn aftur? Á sunnudag ætla ég að skreppa austur og knúsa hestana mína og Litla bróður minn. Mamma verður eitthvað gott í matinn, sjáumst ; )

P.s. Mútta auðvitað færðu líka knús :)

Myndir

2007-02-26T22:34:00.000Z

Já, loksins lærði ég að setja inn myndir. Fékk reyndar góða hjálp frá Öllu, Alla þú myndir sóma þig vel í tæknilegu aðstoðinni :) Takk fyrir hjálpina. Þær eru komnar nokkrar inn og fleiri koma seinna. Ætla einnig að ath hvort að ekki sé hægt að koma inn stuttum myndbrotum sem ég hef náð að taka á símann. Jebbs, þið leynist víða fórnarlömb símans minns. He,he,he.

Tók eitt stykki skyndipróf í vinnusálfræðinni í dag og gekk held ég bara vel :) Hitti Hörpu frænku fyrir utan stofuna eftir prófið en hún smellti sér á námskeið upp í skóla. Ekki að spyrja að dugnaðinum á þeim bænum. Gangi þér vel kæra frænka.

Góðra vina fundur

2007-02-25T23:06:00.000Z

Kíkti í afmæli til Jönu vinkonu í gær og hitti þar fyrir nokkrar góðar sveinsínur. Það var spjallað, skálað, sungið og evrovision textar gagnrýndir. Jana klikkaði ekki á veitingunum frekar en fyrri daginn, hvílík súkkulaðikaka! Til hamingju með daginn skvís ;)

Annars fátt í fréttum annað en landsfundur VinstriGrænna og meðferðavalkvíði Britneyjar vinkonu. Hélt mig að mestu í vinnunni og ofan í skólabókunum um helgina.

Andlitslyfting

2007-02-24T10:58:00.000Z

Já og ekki veitti af. Nýju lífi blásið í hann Blesa og vonandi tekst mér bráðlega að koma inn myndaalbúmi fyrir fjölskyldur og vini að skoða. Já það er allt í bígerð.

Það sem er að gerast:

Gunnar bróðir er að skíra um helgina, Óðinn heitir drengurinn. Til hamingju með drenginn Gunnar og Hrabba :)

Þær Magga Steina og Jana urðu loksins stórar og fagna nú 30 ára afmælum sínum, til hamingju stelpur :)

En þar sem aldurinn mun fljótlega ná á fleiri Sveinsínum fljótlega ákvað ég að láta meðfylgjandi mynd fljóta með sem áminningu um það sem gæti gerst í fjarlægri framtíð.

Stefni á skemmtiferð til Bandaríkjanna í sumar, af til efni af 30 ára afmælinu á árinu, með Hörpu frænku og jafnvel einhverjum co. Ekki verra að hafa ofurleiðsögugúrúinn með í för og svo er hún svo magnaður djammari líka ;)

Er enn að vinna hjá Símoni frænda og komin í aukavinnu hjá SPRON sem er helv. fínt. Aðsjálfsögðu er ég enn í 100% námi við uppáhalds skólann minn, HR.